Dowladda Kenya ayaa bilowday barnaamij lagu horumarinayo xirfadaha iyo fursadaha nololeed, kaas oo lagu taageerayo 450 dhalinyaro iyo haween nugul oo ku nool ismaamulada Nairobi, Kilifi, Kisumu, Isiolo iyo Samburu.
Barnaamijkan ayaa qeyb ka ah dadaallada lagu xoojinayo adkeysiga bulshada iyo ka hortagga xagjirnimada rabshadaha wata.
Mashruuca oo lagu fulinayo barnaamijka Building Resilience and Community Empowerment for Peace (BRACE4PEACE), ayaa ismaamul kasta ka faa’iideysanaya 90 qof, kuwaas oo heli doona tababbarro xirfadeed oo wax ku ool ah, isla markaana ku saleysan baahida suuqa shaqada.
Tababarrada ayaa loogu talagalay in dhalinyarada iyo haweenka lagu kobciyo fursadaha shaqo, ganacsiga iyo awoodda ay ku abuuran karaan dakhli.
Dowladda ayaa sheegtay in barnaamijku uu qeyb ka yahay qorshayaasha lagu xoojinayo isku filnaanshaha bulshada iyo yareynta waxyaabaha dhalin kara xagjirnimo iyo rabshado.
Tababarrada xirfadeed ee barnaamijka BRACE4PEACE ayaa loo qaabeyn doonaa iyadoo lagu saleynayo awoodda dhaqaale ee gobol kasta.
Nairobi, ka qeybgalayaasha waxaa lagu tababari doonaa xalalka dijitaalka ah iyo tiknoolajiyadda macluumaadka iyo isgaarsiinta (ICT), halka Kilifi diiradda lagu saari doono dalxiiska xeebaha.
Kisumu waxaa xoogga la saari doonaa dhaqashada kalluunka ee qafisyada biyaha, halka Isiolo iyo Samburu lagu tababari doono dhaqashada shinnida, farsamada kuulasha iyo farshaxanka gacanta.
Arrintan ayaa lagu sheegay kulankii shanaad ee guddiga hagidda barnaamijka Nabadda-dhisidda iyo Ka Hortagga Xagjirnimada Rabshadaha wata ee Bariga Afrika.
Xoghayaha Wasaaradda Arrimaha Gudaha ee Amniga iyo Maamulka Qaranka, Raymond Omollo, ayaa sheegay in nabad waarta lagu gaari karo iyadoo wax laga qabanayo xaaladaha bulsho iyo dhaqaale ee bulshada ka dhiga kuwo u nugul dambiyada iyo xagjirnimada rabshadaha wata.
Omollo ayaa xusay in horumarinta fursadaha dhaqaale iyo xirfadaha shaqo ay muhiim u yihiin xoojinta adkeysiga bulshada iyo ka hortagga dambiyada iyo rabshadaha.
