Dhismaha wejiyada 2B iyo 2C ee kordhinta Tareenka Xawaaraha Sare ee (SGR), oo ka bilaaban doona Naivasha ilaa Malaba, ayaa la qorsheeyay inuu billowdo bisha Maarso ee sanadkan.
Mashruucan, oo la filayo inuu xoojiyo isku xirka gaadiidka ee Gobolka Harooyinka iyo marinada xuduudda Kenya iyo Uganda, ayaa waxaa xaqiijiyay barasaabka Kisumu Anyang’ Nyong’o Talaadadii ka dib kulan latashi oo ay yeesheen madaxda deegaanka iyo saraakiisha dowladda dhexe.
Kulanka ayaa waxaa ka qayb galay wakiillo ka socday shirkadda Tareennada dalka, Guddiga Qaranka ee Dhulka iyo daneeyayaal kale oo qaran si looga wada hadlo fulinta mashruucan ee malaayiinka shillin lagu maalgelinayo. Nyong’o ayaa sheegay in arrimaha magdhowga dadkii hantidooda iyo dhulkooda laga qaadi doono la siinayo mudnaan, isla markaana geeddi socodka lahaanshaha dhulka lagu maamuli doono si hufan si looga fogaado khilaafaad iyo dib u dhac.
Saraakiisha shirkadda Tareennada ayaa sharaxay sida dhulalka loo aqoonsanayo, loo sahminayo, loona qiimeynayo ka hor inta aan la bixin magdhowga. Madaxda ayaa sidoo kale adkeeyay muhiimadda abuurista fursado shaqo oo dhallinyarada deegaanka loogu talagalay inta lagu jiro dhismaha iyo wixii ka dambeeya, iyaga oo ku heshiiyay in ganacsiyada maxalliga ah lagu daro silsiladaha sahayda, qandaraasyada hoose, iyo fursadaha kale ee ganacsi ee mashruuca la xiriira. Kordhinta khadka tareenka Naivasha, Kisumu iyo Malaba ayaa qayb ka ah qorshaha lagu xirinayo khadka SGR ee Mombasa iyo Nairobi ilaa Galbeedka dalka iyo xuduuda Uganda.
