Adeegga Qaran ee Booliiska ayaa ka hadlay dilka laba qof oo ku dhintay dibadbaxyo ka dhacay degmada Ishiara ee deegaanka Waqooyiga Mbeere ee ismaamulka Embu.
Afhayeenka booliiska, Muchiri Nyaga, ayaa sheegay in ay ka xun yihiin khasaaraha dhimashada, isagoo tacsi u diray qoysaska iyo ehelada dadkii ku geeriyooday dhacdadaas.
Booliiska ayaa sheegay in dibadbaxyada ay ku bilaabmeen si nabad ah, balse markii dambe isu rogeen rabshado sababay burbur hantiyeed iyo dhaawacyo soo gaaray dad rayid ah. Ciidamada ammaanka ayaa la sheegay inay farageliyeen si ay u soo celiyaan kala dambeynta, balse ay la kulmeen rabshado iyo weerarro ka yimid dad hubeysan oo adeegsanayay dhagxaan iyo walxo kale oo khatar ah.
Sidoo kale waxaa la sheegay in dibadbaxyada ay farageliyeen dad aan dan ka lahayn nabadgelyada, taasoo sii kordhisay xiisadda. Booliiska ayaa xaqiijiyay in baaritaan lagu bilaabay dilka labada qof, iyadoo arrinta loo gudbiyay hay’adda madaxa bannaan kormeerka ku sameysa howlaha booliiska ee IPOA si ay u sameyso baaritaan.
Dhanka kale, barasaabka Embu, Cecily Mbarire, ayaa sheegtay in dibadbaxyada ay ka dhasheen cabashooyin la xiriira xaaladda iyo adeegyada isbitaalka Ishiara, iyadoo dhaleeceysay sida ay u dhaqmeen ciidamada ammaanka, gaar ahaan adeegsiga rasaasta nool ee lagu furay dad rayid ah.
