Golaha Barasaabyada (CoG) ayaa cambaareeyay weerar la sheegay in lagu qaaday Guddoomiyaha ismaamulka Samburu, Jonathan Lelelit Lati, iyaga oo ku tilmaamay mid “layaab leh oo aan la aqbali karin.” Golaha ayaa ku eedeeyay qaar ka mid ah senatarrada inay adeegsadeen rabshad iyo cabsi gelin, iyadoo ay xiisad ka dhalatay kulamada barsaabyada iyo Guddiga Xisaabaadka Dadweynaha ee Senate-ka (CPAC).
Guddoomiyaha CoG, Axmed Cabdullaahi, ayaa sheegay in dhacdadan ay dhaawac ku tahay karaamada xafiiska barasaabka iyo nidaamka dastuuriga ah, isla markaana ay halis ku tahay xeer ilaalinta sharciga. Golaha ayaa tilmaamay in ficilkan uu hoos u dhigayo karaamada xafiiska guud ee barasaabka, isla markaana uu khatar ku yahay mabda’a dastuuriga ah iyo ilaalinta sharciga.
Barasaabyada ayaa xusay in Senate-ka, oo ah “Aqalka Sare” ee loo xil saaray ilaalinta danaha maamulada dowlad deegaannada, ay leedahay habab sharci ah oo lagu fuliyo kormeerkeeda, isla markaana aanay ku habboonayn in loo adeegsado cabsi gelin, rabshad ama cadaadis. Golaha ayaa ku baaqay in Afhayeenka Senate-ka uu cambaareeyo senatarrada ku lugta lahaa dhacdadan, islamarkaana la dedejiyo xalinta cabashooyinka barasaabyada ay ka qabaan xubnaha Guddiga CPAC.
Golaha Barasaabyada ayaa sidoo kale tilmaamay in weerarka la sheegay uu noqon karo dambi, isla markaana ay raaci doonaan tallaabooyin sharci. Waxaa kale oo ay ku booriyeen in la ilaaliyo xadgudub la’aan, xuquuqda aadanaha, iyo xeer ilaalinta sharciga, ayna jirto baahi degdeg ah oo loo qabo in la adkeeyo nidaamka dastuuriga ah iyo kalsoonida hay’adaha dadweynaha.
