Madaxweynaha dalka William Ruto oo maanta khudbad ka jeediyay xuska qaran ee maalinta Jamhuri Day oo lagu qabtay fagaaraha Uhuru Gardens ee ismaamulka Nairobi ayaa sheegay in hadda laga gudbay in shacabka loo ballan qaado waxyaabo dheeraad ah.
Waxaa uu xusay in maamulkiisa uu xoogga saaraya dhaqangelinta mashaariicdii horumarineed ee uu horay u ballan qaaday fulintooda.
Waxaa uu waalidiinta ka codsaday in ay oggolaadaan in carruurta loo diiwaangeliyo caymiska caafimaadka ee SHA si marka dugsiyada dib loo furo sanadka cusub ay uga faa’iidaystaan adeegyada SHA.
Madaxweyne William Ruto ayaa dhanka kale sheegay inuu sii wadi doono ka shaqeynta xoojinta midnimada kenyaanka iyadoo aan la eegayn arrimo siyaasadeed, qabiil mise diin. Waxaa uu cadeeyay inuu diyaar u yahay inuu si dhow ula shaqeeyo dhammaan hoggaamiyaasha siyaasadeed.
