Waxaa albaabada la isugu dhuftay dugsiyada ku yaala dalka Malawi oo xirnaan doono ugu yaraan 15 cisho .
Tallaabadan ayaa looga gol-leeyahay xakameynta faafitaanka caabuqa corona.
Madaxweynaha dalkaas Lazarus Chakwera oo khudbad qaran jeediyay ayaa sidoo kale ku dhawaaqay bandow habeenkii oo billaabanaya 9-ka fiidnimo.
Sidoo kale isku imaatinka dadweynaha waxaa loo oggol yahay inay ka qayb galaan oo keliya 50 qof.
Tani ayaa imaanaysa iyadoo ilaa iyo hadda 300 oo qof ay cudurka COVID-19 ugu dhinteen Malawi.
Madaxweynaha ayaa dhanka kale sheegay in 2 milyan oo doolar loo qoondeynaya daryeelka howlwadeenada caafimaadka iyo soo iibinta agabka ay u baahan yihiin.
