Golaha qaran ee xeer dejinta ayaa kordhiyay muddo xileedka guddiga loo xil saaray shaqaaleysiinta mas’uuliyiinta sare iyo xubnaha guddiga madaxa bannaan ee doorashooyinka iyo xudduudaha waddanka ee (IEBC).
Waxaa uu horay qorshuhu ahaa in guddigan uu shaqeeyo ilaa 28-ka bishan Afaraad.
Hasa ahaate , mooshin ay si wadajir ah u taageereen hoggaamiyaha aqlabiyadda baarlamaanka Kimani Ichung’wah iyo dhiggiisa siyaasiyiinta laga tirada badan yahay Junet Maxamad ayaa horseedaya in xubnaha guddigan ay sii shaqeeyaan ilaa 12-ka bisha Shanaad ee May ee sanadkan.
Waxaa hadda la sugaya in muddo kordhintan uu ansixiyo aqalka sare ee dalka ka hor inta aan lagu soo daabicin wargeyska rasmiga ee dowladda.
Tani ayaa imaanaysa iyadoo madaxa xisbiga Wiper Kalonzo Musyoka, dhiggiisa DAP-Kenya Eugene Wamalwa iyo hoggaamiyaha xisbiga PLP Martha Karua ay dowladda talada haysa ku eedeeyeen in ay saameyn ku yeelanaysa geeddisocodka lagu howlgelinaya saraakiisha guddiga IEBC.
