Maamulka Jaamacadda Nairobi ayaa qiray in machadka ay soo food saartay dhibaato dhaqaale iyadoo deymaha lagu leeyahay ay kor u dhaafayaan 12 bilyan oo shillin taasoo loo aaneeyay kharashaadka wasaaradda waxbarashadda oo la dhimay.
Khilaafka sii kordhaya ee u dhaxeeya ku simaha gudoomiye ku xigeenka ee jaamacada iyo golaha sare ee machadka ayaa xaalada sii kiciyay. Guddoomiye ku xigeenka ayaa ku andacoonaya in golaha uu gaarayay go’aamo muhiim ah, oo ay ku jiraan shaqo ka cayrin, isaga oo aan wax talo ah lala wadaagin.
Guddiga waxbarashadda ee barlamaanka dalka ayaa shalay u kuur galay si ay u ogadaan dhibaatooyinka ka dhex jira jaamacada.
Maamulka jaamacadda, oo ay hogaamiso Ku-xigeenka ku simaha guddoomiyaha jaamacada Margaret Jesang Hutchinson, ayaa ka hadashay sababaha keenay dhibaatooyinka machadka.
Waxaa ay sheegtay in deymahan dhan 12-ka bilyan ay ka mid yihiin kuwa shaqaalaha howlgabka ah oo dhan 7.8 bilyan iyo canshuuraha ay hay’adda dhakhliga ee dalka KRA ay jaamacada ku leedahay oo dhan 4 bilyan.
Xaruumaha jamaacada ay ku leedahay magaalooyinka Mombasa iyo Kisumu ayaa sidoo kale albaabaha loo laabay maadama ay yaraadeen ardeydii iska diwaan gelin jirtay goobahaas waxbarasho.
Guddiga wax barashada barlamaanka ayaa go’aan ku gaaray inay tahay in tallabo deg deg ah la qaado si loo xaliyo arrimahan.
