Wasiirka wasaaradda gaashaandhigga ee dalka Pakistan Khawaja Asif ayaa maanta sheegay in laga baaran degaya in wadankaasi laga mamnuuco xisbiga PTI ee uu hoggaamiyo Ra’iisul Wasaarihii hore ee dalkaasi Imran Khan.
Waxaa uu wasiirku sheegay in arrinkan loo aaneynaya in PTI ay weerartay dowladda.
Khawaja Asif ayaa warfidyeennada u sheegay in xisbiga Imran Khan uu weeraray aasaaska dowladnimada taasoo aan loo dulqaadan karin.
Waxaa uu intaasi ku daray in la eegaya suuragalnimada xisbigan looga mamnuuci karo dalkaasi in kastoo baarlamaanka uu leeyahay go’aanka kama dambeyska ah ee lagu ansixinaya ama lagu hor istaagaya qorshaha dowladda .
Waxay wararku sheegayaan in haddii go’aankan lagu dhaqaaqo uu noqon karo mid ay ka caroodaan taageerayaasha Imran Khan tani oo sare u sii qaadi karta khilaafka kala dhexeya dowladda.
