Hoggaamiyaha aqlabiyadda baarlamaanka dalka Kimani Ichung’wah ayaa beeniyey eedeyn loo jeediyay oo ahayd inuu ka dambeeyay weerar Isniintii lala eegtay beerta qoyska madaxweynihii hore ee dalka Uhuru Kenyatta.
Xilli uu warbaahinta kula hadlay xarunta baarlamaanka ayuu Ichung’wah xusay in eedeynta loo jeediyay ay tahay mid lagu dhaawacaya sumcadiisa.
Xildhibaanka deegaanka Kikuyu ee ismaamulka Kiambu ayaa xusay in uunan falkaasi ku lug lahayn.
Toddobaadkii hore ayay ahayd markii isagoo ku sugan Kirinyaga uu Ichung’wah digniin u diray Uhuru oo uu sheegay in haddii aan la joojin burburinta hantida dadweynaha in isagana ay saameyn soo gaari karto.
Siyaasiyiinta Kenya Kwanza ayaa Uhuru ku eedeyay inuu maalgelinaya dibadbaxyada Azimio in kastoo Kenyatta uunan weli eedeyntan ka jawaabin.