Hoggaamiyaasha dalladda ay ku mideysan yihiin 20-ka waddan ee caalamka ugu horreeya dhanka dhaqaalaha ee (G20) oo shir ku yeeshay jasiiradda Bali ee dalka Indonesia ayaa si wayn u cambaareeyay duullaanka militari ee ay dowladda Ruushku ka wado gudaha wadanka Ukraine.
Xubnaha G20 ayaa sheegay in tan iyo 24-kii bishii labaad ee sanadkan xukuumadda Moscow ay gardarro u gaysanaysay Ukraine.
Qaraarka ay maanta oo Arbaco ah ansixiyeen ayaa waxaa ku cad in xubnaha G20 badankoodu ay si kulul u cambaareynayaan dagaalka Ruushka ee Ukraine.
Hasa ahaate Ruushka ayaan durbaba arrintan bayaan ka soo saarin.
War-murtiyeedka madaxda dalladda G20 ayaa lagu sheegay inay qasab tahay in loo hoggaansamo xeerarka caalamiga ah
Xoghayaha guud ee qaramada midoobay Antonio Guterres, ayaa dhankiisa sheegay inay aad muhiim u tahay in la iska ilaaliyo sii hurinta colaadda Ukraine.
