Hoggaamiyeyaasha mucaaradka Kenya ayaa ballanqaaday inay mideysnaan doonaan ka hor doorashada guud ee 2027, iyagoo sheegay inay soo bandhigi doonaan hal musharrax oo madaxweyne oo la loollami doona Madaxweyne William Ruto.
Hoggaamiyaha Xisbiga Wiper Kalonzo Musyoka, hoggaamiyaha DAP-Kenya Eugene Wamalwa, hoggaamiyaha Democratic Party Justin Muturi iyo Senator-ka Nairobi Edwin Sifuna ayaa hadalladan ka sheegay munaasabado kala duwan oo ay ka qaybgaleen magaalada Kitui.
Waxay sidoo kale ballanqaadeen inay difaaci doonaan Dastuurka isla markaana ay riixayaan dib-u-habeyn lagu sameeyo nidaamka doorashada.
Isagoo ka hadlayay Maalinta Qaranka ee Ducada ee Isbahaysiga Culimada Kenya oo lagu qabtay Kitui, Musyoka ayaa meesha ka saaray wararka sheegaya in uu jiro kala qaybsanaan ka dhex jirta mucaaradka, isagoo ku adkeystay in hoggaamiyeyaashu ay weli ka go’an tahay inay si wadajir ah u shaqeeyaan.
Musyoka iyo Wamalwa ayaa sheegay in mucaaradku uu mideysnaan doono inta lagu jiro doorashada 2027 iyo wixii ka dambeeya.
Labada hoggaamiye ayaa sidoo kale diiday hindisaha wada-hadalka qaran ee uu Madaxweyne Ruto hormuudka ka yahay, iyagoo ku tilmaamay olole lagu hagaajinayo sumcadda dowladda.
Wamalwa ayaa ku raacay hadalkaas, isagoo sheegay in mucaaradku ay muddo afar sano ah si wadajir ah u soo socdeen, ayna ka tanaasuli doonin safarkaas iyadoo ay doorashada ka harsan yihiin bilo kooban.
Hoggaamiyeyaashu waxay sidoo kale diiradda saareen Guddiga Madaxa-bannaan ee Doorashooyinka iyo Xuduudaha, IEBC, iyagoo ugu baaqay guddiga doorashada inuu dammaanad qaado doorasho xor iyo xalaal ah sanadka 2027.
Musyoka ayaa guddiga ugu baaqay inuu hubiyo in dhammaan musharraxiinta iyo ururrada siyaasadeed ay helaan fursad siman oo ay doorashada ugu tartamaan.
Dhanka kale, Muturi ayaa walaac ka muujiyay dib u dhaca ku yimid dib-u-eegista iyo dejinta xuduudaha deegaannada doorashada, isagoo sheegay in hawshaasi ay muddo dheer dib u dhacday.
Dastuurka ayaa dhigaya in IEBC ay dib-u-eegis ku sameyso xuduudaha deegaannada doorashada iyo waaxyaha maamulka muddo u dhexeysa siddeed ilaa 12 sano.
Dhanka kale, Sifuna oo Kitui u tegay daahfurka ololaha musharrax u taagan xilka guddoomiyaha gobolka, ayaa sheegay in ajandaha mucaaradku uu ka mid yahay ilaalinta xorriyadda hadalka iyo soo afjaridda waxa uu ku tilmaamay caburinta dadka aragtidooda ka dhiibta dowladda.
Senator-ka Nairobi ayaa sheegay in dowlad mucaarad ahi aysan u dulqaadan doonin in xoog loo adeegsado dadka Kenyaanka ah sababo la xiriira dhaleeceynta ay u jeediyaan Madaxweynaha.
