Madaxweynaha Kenya William Ruto ayaa ugu baaqay Guddiga Adeegga Dadweynaha (PSC) inay dedejiyaan dib-u-habaynta lagu horumarinayo adeegga dadweynaha, si uu u taageero qorshaha Kenya ugu gudbayso dhaqaale heer caalami ah oo la jaanqaadi kara dalalka horumaray.
Madaxweynaha ayaa hadalkan sheegay Arbacadii intii uu Aqalka Madaxtooyada ee State House, Nairobi ku qaabilayay xubnaha Guddiga Adeegga Dadweynaha, oo uu hoggaaminayay guddoomiyaha guddiga, Francis Meja.
Ruto ayaa carrabka ku adkeeyay muhiimadda ay leedahay in la xoojiyo hufnaanta, tayada iyo waxqabadka adeegga dadweynaha, si loo xaqiijiyo himilooyinka horumarineed ee dalka iyo koboca dhaqaalaha mustaqbalka.
Ruto ayaa sheegay in qaadashada isbeddelka dhanka tiknoolajiyadda ay lama huraan u tahay kor u qaadista hufnaanta shaqada, dardargelinta bixinta adeegyada dadweynaha iyo sare u qaadidda tayada adeegyada ay helaan muwaadiniinta.
Madaxweynaha ayaa xusay in casriyeynta adeegga dadweynaha ay door muhiim ah ka ciyaari doonto taageeridda qorshayaasha horumarineed ee dowladda iyo dhismaha dhaqaale casri ah oo tartan caalami ah yeelan kara.
