Mareykanka ayaa si rasmi ah ugu casuumay Kenya in ay ka mid noqoto iskaashi cusub oo ku saabsan macdanta muhiimka ah ee caalamka, ka dib markii Kenya ay billowday tartan lagu soo bandhigayo kaydka macdanta ee buuraha Mrima ee dowlad deegaanka Kwale.
Ku simaha Safiirka Mareykanka ee Kenya Susan Burns ayaa sheegtay in fursaddaas ay ka hadashay shirweynaha maalgashiga macdanta, iyadoo ku boorrisay dalalka Afrika inay ka faa’iideystaan kheyraadkooda halkii ay lumin lahaayeen fursadaha suuqa caalamiga ah. Waxaa ay sidoo kale tilmaamtay in Mareykanka uu doonayo nidaam ganacsi oo cusub oo ilaalinaya dalalka leh macdanta.
Burns ayaa sheegtay in suuqa macdanta caalamka uu wajahayo caqabado waaweyn oo la xiriira maalgelin, shaqo abuur iyo xasillooni, iyadoo Mareykanka uu doonayo in uu wax ka beddelo nidaamkaas. Waxaa ay sidoo kale xustay in Xukuumadda Washington ay kordhisay maalgelinta iyo dardargelinta mashaariicda macdanta, isla markaana ay ka shaqeyneyso iskaashi toos ah oo lala yeesho dalalka hodanka ku ah kheyraadka.
Kaydka macdanta ee Buuraha Mrima oo lagu qiyaasay in uu qiimihiisu gaarayo 8.1 tiriliyan shillin ayaa ka mid ah kaydadka macdanta ee sida weyn loo danaynayo, iyadoo ay jiraan dalal waaweyn oo tartan ugu jira. Mareykanka ayaa sheegay in Kenya loo arko saaxiib ganacsi oo leh nidaam sharci oo hufan, taas oo ka dhigaysa meel muhiim ah oo lagu horumarin karo maalgashi macdan oo mas’uul ah.
