Madaxweyne William Ruto, ayaa saxiixay Sharciga Wax ka beddelka Canshuurta Qiima Kordhinta (VAT) ee 2026, isagoo hoos u dhigay canshuurta shidaalka laga qaado boqolkiiba 16 ilaa 8 si loo dejiyo caro ka dhalatay kororka qiimaha shidaalka.
Sharcigan oo uu soo gudbiyay hoggaamiyaha aqlabiyadda Baarlamaanka, Kimani Ichung’wah, ayaa lagu ansixiyay si degdeg ah 16-kii bishan oo shalay ahayd, iyadoo aan wax wax ka beddel ah lagu samayn, si wax looga qabto saameynta ka dhalatay colaadaha Bariga Dhexe ee sahayda shidaalka.
Wax ka beddelka cusub ayaa dhigaya in canshuurta la dhimay ay shaqeyn doonto muddo 90 maalmood ah, iyadoo Wasiirka Maaliyadda John Mbadi loo oggolaaday inuu kordhin karo muddo kale oo 90 maalmood ah haddii loo baahdo. Go’aankan ayaa sidoo kale si dib u dhac ah ugu dhaqan galay 15-kii bishan April.
Hoos u dhigidda canshuurta ayaa sababtay in qiimaha shidaalka uu hoos u dhaco, iyadoo baatroolka uu hoos ugu dhacay 9.37 shillin halkii litir, naaftaduna 10.21 shillin oo shillinka dalka ah. Qiimaha ugu badan ee baatroolka ayaa hadda ah 197.60 shillin halkii litir, naaftaduna 196.63, halka gaaska uu yahay 152.78. Dowladda ayaa sheegtay in tallaabadan ay yareyn doonto saameynta guud ee dhaqaalaha, inkastoo ay jirto dhaliil ka timid qaar ka mid ah dadweynaha.
