Wasaaradda arrimaha gudaha iyo maamulka qaranka ayaa xaqiijisay in ay ka go’an tahay dib u habeynta booliiska iyo la xisaabtanka guud ee laamaha ammaanka dalka, iyadoo ku dhawaaqday in la socodka CCTV ay qasab ku noqon doonto dhammaan saldhigyada booliiska dalka oo dhan labada sano ee soo socota.
Wasiirka arrimaha gudaha Kipchumba Murkomen oo ka hadlayay mar uu khudbad ka jeedinayay xaaladda amniga dalka ayaa sheegay in awaamiirta siyaasadda cusub la sameeyay ka dib markii la tashiyo iyo dib u milicsi lagu sameeyay dhacdooyinkii hore iyo kuwa hadda socda ee booliiska.
Ku dhawaaqidani ayaa waxaa ay daba socotaa welwelka sii kordhaya ee dadweynaha ee ku saabsan dhimashada dahsoon ee Albert Ojwang isagoo gacanta booliiska ku jira.
Murkomen waxaa uu xusay in dib u habayntan looga dan leeyahay in lagu hubiyo in si weyn loo arki karo iyo la socodka falalka sharci fulinta ee ka jira xaruumaha booliiska.
Mr. Kipchumba ayaa waxaa uu sheegay in Wasaaraddiisa ay soo jeedin doonto sharci lagu ciqaabayo faragelinta, curyaaminta, ama xannibaadda qalabka CCTV ee gudaha xaruumaha booliiska. Nidaamyada waxaa si toos ah u kormeeri doona Taliyaha Saldhigga Booliiska kaas oo si shakhsi ah loogala xisaabtami doono shaqadooda.
Intaa waxaa dheer, wuxuu sheegay in wixii khalad ah ee ka jira nidaamyada CCTV ay u baahan doonaan in lagu soo sheego hal saac gudaheed, kaabayaashana waxaa ku jiri doona habab kayd ah oo dibadda ah si loo ilaaliyo xogta la duubay.
Wasiirka ayaa intaa ku daray in buugagta diiwaan gellinta eedeeysanayaasha laga dhigi doono kuwo casri ah sanadka soo socda si loo ilaaliyo xog kasta oo saldhigga laga diiwaangeliyo.
Isla mar ahaantaana, Murkomen wuxuu ku dhawaaqay in ay jiri doonto tababar joogto ah oo horumarinta xirfadeed oo loogu talagalay dhammaan saraakiisha, laga bilaabo OCS-yada, si loo soo celiyo xirfadda, anshaxa, iyo adeegga ugu sarreeya ee dhammaan darajooyinka.
Waxaa kale oo uu tilmaamay in saldhig kasta laga samayn doono qorshayaal lagu ilaalinayo bulshada si loo wanaajiyo xiriirka boolisika iyo shacabka.
Dhanka kale, Murkomen ayaa waxaa uu ku celceliyay in loo baahan yahay is ixtiraam dhexmara booliiska iyo shacabka, isagoo xasuusiyay in sidoo kale dadka rayidka ah ay hoos yimadaan sharciga.
