Xulafada siyaasadeed ee Madaxweyne William Ruto ayaa mucaaradka ku eedeeyay inay doonayaan inay dalka qalalaase geliyaan xilliga doorashooyinka 2027.
Iyagoo Sabtidii ka hadlayay magaalada Vihiga, intii lagu guda jiray aaska aabbaha xildhibaanadda haweenka ee ismaamulka Vihiga, Beatrice Adagala, ayay hoggaamiyeyaashu cambaareeyeen ka bixitaankii mucaaradka ee kulankii IEBC ee Khamiistii, iyagoo ku tilmaamay bisayl-darro siyaasadeed.
Wasiirka Tamarta iyo Batroolka, Opiyo Wandayi, ayaa dhaliilay garabka ka soo horjeeda Ruto, isagoo ku eedeeyay inay ku mashquulsan yihiin arrimo siyaasadeed oo aan muhiim ahayn. Wuxuu ka bixitaankooda kulankii IEBC ku tilmaamay bisayl-darro siyaasadeed.
Madaxweyne-ku-xigeenkii hore Rigathi Gachagua ayaa dhaleeceyn xooggan kala kulmay hoggaamiyeyaasha, kaddib hadalladiisii ku saabsanaa suurtagalnimada dibadbaxyo haddii la wiiqo kalsoonida lagu qabo doorashooyinka 2027.
Hoggaamiyeyaashii halkaas joogay ayaa Kenyanka ugu baaqay inay codkooda ku saleeyaan waxqabadka Madaxweyne Ruto, halkii ay ka raaci lahaayeen hadallo siyaasadeed oo ay ku tilmaameen kuwo aan waxba ka jirin.
Iyadoo ka hadlaysay Bangale, Ismaamulka Tana River, xildhibaanadda haweenka ee deegaankaas, Amina Dika, ayaa dadka deegaanka ku boorrisay inay taageeraan ololaha dib-u-doorashada Madaxweyne Ruto, iyadoo sabab uga dhigtay waxa ay ku tilmaantay in si loo dhan yahay loo qaybiyo mashaariicda horumarinta.
Guddoomiyihii hore ee Ismaamulka Garissa, Ali Korane, ayaa isaguna yiri: “Annaga dhexdeenna, waxaa wanaagsan inaan ku kala aragti duwanaanno arrimaha kuraastan kale, balse waa inaan midoownaa oo aan hal cod ku hadalnaa, annagoo leh Ruto waa inuu noqdaa madaxweyne laba xilli.”
Home Wararka Kenya Xulafada Madaxweynaha oo mucaaradka ku eedeeyay inay qorsheynayaan qalalaase ka hor doorashooyinka...




