Saraakiisha dowladda federaalka Mareykanka ayaa baaritaan ka sameeyay guriga Ilhan Omar, oo ah xildhibaan ka tirsan Xisbiga Dimuqraadiga isla markaana si weyn u dhaliisha madaxweyne Donald Trump. Guriga ayaa ku yaalla agagaarka magaalada Washington, DC, waxaana baaritaanku la xiriiraa kiis dambiyeed oo weli socda.
Wakaaladda wararka ee Associated Press AP ayaa sheegtay in saraakiil ka tirsan Waaxda Baaritaannada Amniga Gudaha oo qayb ka ah kuwa socdaalka ay baaritaanka sameeyeen aroornimadii hore ee Isniinta, iyadoo soo xiganaysa laba qof oo xog-ogaal u ah arrintan.
Wasaaradda Caddaaladda Mareykanka ayaa xaqiijisay in saraakiishu fuliyeen amar maxkamadeed oo oggolaanayay baaritaanka, balse ma aysan magacaabin Omar, mana aysan faahfaahin baaritaanka socda.
Telefishinka Fox News ayaa, isaga oo soo xiganaya ilo aan la magacaabin, sheegay in baaritaanku la xiriiray eedeymo ku saabsan musuqmaasuq la xiriira socdaalka, kuwaas oo salka ku haya dukumentiyo uu aabbaheed geeriyooday gudbiyay xilli ay Ilhan Omar carruur ahayd. Omar ayaa hore u beenisay eedeymahaas, mana jirto wax dacwad ah oo ilaa hadda lagu dhawaaqay.
Xildhibaannadan oo ku dhalatay Soomaaliya ayaa Mareykanka timid iyadoo ah qaxooti carruur ah, dabadeedna qaadatay dhalashada Mareykanka. Waxay matashaa degmo ku taalla gobolka Minnesota oo ay ku jirto magaalada Minneapolis.
Ilhan ayaa muddo dheer bartilmaameed u ahayd weerarrada siyaasadeed ee Trump, gaar ahaan kuwa la xiriira socdaalka.
Bishii Sebtembar, Tom Homan oo ah madaxa arrimaha xuduudaha ee Trump ayaa sheegay in Ilhan ay baaritaan dambiyeed ku socdaan, balse ma uusan bixin faahfaahin dheeraad ah.
Ilhan ayaa xilligaas sheegtay in aysan wax xiriir ah kala soo samayn Waaxda Amniga Gudaha, iyadoo eedeymaha ku tilmaantay kuwo dano siyaasadeed laga leeyahay.
Madaxweyne ku-xigeenka Mareykanka, JD Vance, ayaa sidoo kale hore ugu eedeeyay musuqmaasuq la xiriira socdaalka, isaga oo aan soo bandhigin wax caddeyn ah.
Xafiiska Ilhan ayaa bishii Maarso eedeymaha Vance ku tilmaamay “been-abuur iyo sumcad-dil”. Ilaa hadda ma jirto jawaab degdeg ah oo ay Omar ka bixisay baaritaanka gurigeeda ee Isniintii.
Baaritaankan ayaa dhacaya wax ka yar afar toddobaad ka hor doorashooyinka dhexe ee Mareykanka, oo loo qorsheeyay 3-da Nofeembar. Doorashooyinkaas ayaa xisbiga Jamhuuriga uu ku dadaali doonaa inuu ku sii haysto gacan-ku-haynta Aqalka Congress-ka.
Omar ayaa sheegtay in iyada iyo qoyskeedu ay heleen hanjabaado dil ah, kuwaas oo ay ku xirtay hadallada Trump. Waxay sidoo kale ku tilmaantay sida uu madaxweynuhu ugu mashquulsan yahay iyada mid cabsi iyo dhib ku ah.
Bishii Diseembar, Trump ayaa iyada iyo muhaajiriin kale oo Soomaali ah ku tilmaamay “qashin”.
