Wasiirka Arrimaha Gudaha Kipchumba Murkomen ayaa hoggaamiyay dib u soo celinta ugu dambeysa ee ciidamada booliiska Kenya ee ka qayb qaadanayay Howlgalka Amniga Caalamiga ah ee Haiti (MSS), iyadoo howlgalka uu u wareegayo Qaab cusub oo loo yaqaan Ciidanka La dagaallanka iyo Xakamaynta Burcadda (GSF).
Murkomen ayaa hadalka ka jeediyay Garoonka Caalamiga ah ee Toussaint Louverture ee magaalada Port-au-Prince, halkaas oo uu sheegay in ciidamada Kenya ay Haiti ka howlgalayeen tan iyo bishii Juun 2024, isla markaana ay ka tageen bulshooyin ay amnigooda si dhow uga shaqeeyeen.
Waxaa uu xusay in Kenya ay ballanqaadday in ay dirtay 1,000 askari oo booliis ah si ay u taageeraan howlgalka oo lagu ansixiyay Qaraarka Golaha Ammaanka ee Qaramada Midoobay, iyadoo Kenya ay ahayd dalka hoggaaminayay howlgalka. Waxaa uu sheegay in 200 askari la diray bishii Juun 2024, halka ugu dambayn tirade ay gaartay 730 askari sababo la xiriira caqabado saadka ah.
Murkomen ayaa sheegay in muddadii 18-ka bilood ahayd, ciidamada Kenya iyo kuwa Haiti ay si wadajir ah uga shaqeeyeen soo celinta kala dambeynta, ilaalinta kaabayaasha muhiimka ah, iyo fududeynta soo laabashada adeegyada dowladeed. Waxaa uu sidoo kale xusay geerida saddex askari oo Kenyaan ah, isagoo adkeeyay in Kenya ay sii wadi doonto u hoggaansanaanta isla xisaabtanka iyo hufnaanta howlgalladeeda caalamiga ah.
