Maxkamadda Racfaanka ayaa qaaday amarkii ku meel gaarka ahaa ee hakiyey qorshaha dowladda ee lagu iibinayey boqolkiiba 15 saamiyada ay ku leedahay shirkadda isgaarsiinta ee Safaricom, taas oo u oggolaanaysa in heshiiskaasi uu sii socdo. Maxkamadda Sare ayaa hore u hakisay macaamilkan oo lagu qiimeeyey 204.3 bilyan oo shillinka dalka ah, iyadoo sugeysay dhageysiga dacwad dastuuri ah oo lagu muransanaa sharciyadda iibka.
Go’aanka oo ay soo saareen saddex garsoore ayaa lagu sheegay in dowladda ay buuxisay shuruudihii sharci ee looga baahnaa si loo qaado amarkii hakinta ahaa. Maxkamadda ayaa sidoo kale xustay in racfaanka dowladda uu xambaarsan yahay arrimo sharci oo muhiim ah oo mudan in si buuxda loo dhageysto, isla markaana danaha guud ay taageerayaan in la oggolaado sii socoshada heshiiska.
Sida qorshaha uu yahay, dowladda ayaa doonaysa inay saamiyadan ka iibiso shirkadda isgaarsiinta ee Vodacom oo laga leeyahay Koonfur Afrika. Haddii heshiiska uu hirgalo, saamiga Wasaaradda Maaliyadda Qaranka ee Safaricom ayaa hoos uga dhacayaa boqolkiiba 35 noqon doonane boqolkiiba 20. Vodacom ayaa oggolaatay inay saamiyada ku iibsato qiime dhan 34 shillin halkii saami.
Dacwadda lagu horjoogsaday iibka ayaa waxaa gudbiyey Tony Gachoka iyo Fredrick Ogola, kuwaas oo ku dooday in qiimaha lagu iibinayo saamiyada uu aad uga hooseeyo qiimahooda dhabta ah oo ay ku qiyaaseen inta u dhaxaysa 70 ilaa 80 shillin halkii saami. Waxaa ay sidoo kale ku eedeeyeen dowladda inay doonayso inay wareejiso hanti istaraatiiji ah oo dadweyne iyadoo aan la raacin shuruudaha dastuuriga ah ee daahfurnaanta, ka qaybgalka dadweynaha iyo isla xisaabtanka. Maxkamadda Racfaanka ayaa caddeysay in go’aankeeda uusan ahayn mid lagu go’aaminayo sharciyadda iibka laftiisa, balse uu ku koobnaa in la qaado amarkii hakinta ahaa inta dacwadda asaasiga ah la dhageysanayo.
