Hal qof ayaa ku dhintay, halka 46 qof oo kale ay ku dhaawacmeen rabshado ka dhacay isu-soo-baxii siyaasadeed ee Linda Mwananchi, kaas oo ka dhacay magaalada Homa Bay.
Toddoba ka mid ah dadka dhaawacmay ayaa xaaladdoodu aad u daran tahay, halka afar qof ay soo gaareen dhaawacyo rasaas ah, kaddib markii kooxo hubeysan ay weerareen taageerayaasha Linda Mwananchi xilli ay magaalada Homa Bay uga soo gudbayeen deegaanka Sindo ee Suba South.
Sida laga soo xigtay Isbitaalka Waxbarashada iyo Gudbinta Homa Bay, qofka dhintay ayaa ahayd haweeney u dhalatay Uganda, waxaana la sheegay in gaari uu jiiray xilli ay socdeen rabshaduhu. Waxay ku geeriyootay isbitaalka iyadoo loo fidinayay daryeel caafimaad.
Inta badan dadka dhaawacmay ayaa la sheegay inay soo gaareen dhaawacyo culus oo ka dhashay baangado iyo hub kale oo gacanta ah.
Dhammaan 46-ka qof ayaa markii hore loo qaaday Isbitaalka Homa Bay County Teaching and Referral Hospital si loogu sameeyo daryeelka degdegga ah, balse markii dambe waxaa loo gudbiyay xarumo caafimaad oo gaar loo leeyahay oo ku yaalla gobolka, sababo la xiriira shaqo-joojinta ay ku jiraan kalkaaliyeyaasha caafimaadka.
Rabshadaha ayaa sidoo kale sababay burbur iyo gubasho loo geystay gaadiid iyo hanti kale oo ku taalla magaalada Homa Bay.
Lix gaari ayaa la sheegay inay gubeen kooxo hubeysan oo xiray waddada Homa Bay-Mbita, gaar ahaan inta u dhexeysa deegaanka Lala iyo Junction Kodoyo, si ay uga hor istaagaan kooxaha Linda Mwananchi inay galaan magaalada Homa Bay.
Gaadiidkii la gubay ayaa markii dambe loo jiiday saldhigga booliska Homa Bay, iyadoo baaritaanno lagu sameynayo dhacdada.
Kooxo hubeysan ayaa sidoo kale weeraray xarunta Seventh Day Adventist ee SDA Lake Victoria Field oo ku taalla deegaanka Lala, halkaas oo ay waxyeello u geysteen dhismaha iyo gaadiid ku jiray goobta baarkinka.
Madaxa Lake Victoria Field, Pastor Samson Okwach, ayaa sheegay in weerarka lagu burburiyay hanti qiimaheeda aan weli la xaqiijin.
Pastor Okwach ayaa cambaareeyay rabshadaha siyaasadeed ee ka dhacay Homa Bay, wuxuuna ugu baaqay hoggaamiyeyaasha deegaanka inay qaataan wada-hadal iyo xal nabadeed si looga hortago dhiig kale oo daata.
