Agaasimaha waaxda dambi Baarista ee dalka (DCI) Mohamed Amin ayaa ballanqaaday dagaal ka dhan ah isticmaalka daroogada, isagoo ku boorriyay iskaashi xooggan oo bulshada iyo booliiska ah, wuxuuna ka digay in saraakiisha ku lug leh shabakadaha sharci darrada ah ee ka ganacsada Maandooriyaha ay la kulmi doonaan cawaaqib xumo daran.
Isagoo soo gabagabeyay safar qiimeyn amni oo ka dhacay ismaamulka Marsabit, Mr. Amin wuxuu ku nuuxnuuxsaday baahida degdegga ah ee loo qabo tallaabo wadajir ah si loo ilaaliyo bulshooyinka, gaar ahaan dhallinyarada saameynta ba’an ka soo gaartay isticmaalka khamriga iyo daroogada.
Wuxuu arrintan ku tilmaamay khatar weyn oo ku wajahan horumarka qaranka iyo amniga.
Intii lagu guda jiray safarka, Agaasimaha DCI wuxuu booqday dhowr saldhig booliis, wuxuuna qiimeeyay diyaargarowga hawlgalka daroogada, wuxuuna si toos ah ula shaqeeyay saraakiisha iyo dadka deegaanka si kor loogu qaado niyadda iyo iskaashiga.
Wuxuu saraakiisha ku ammaanay dadaalkooda isagoo ku nuuxnuuxsaday muhiimadda ay leedahay taageerada bulshada ee ka hortaga iyo burburinta shabakadaha ka ganacsada daroogada.
Mr. Amin wuxuu faray taliyayaasha booliiska ee dalka oo dhan inay qaadaan tallaabo go’aan qaadasho ah oo ka dhan ah iibiyayaasha maandooriyaha iyo kuwa dhoofiya daroogada sharci darrada ah.
Wuxuu iftiimiyay qorshayaasha dowladda ee lagu xoojinayo awoodda Qaybta La-dagaallanka Maandooriyaha ee DCI iyadoo la adeegsanayo qalab casri ah, awoodo sirdoon, iyo ilo baaritaan si wax ku ool ah wax looga qabto khatarta.
Farriin adag oo uu diray Agaasimuhu, ayuu kaga digay in saraakiisha fulinta sharciga ama mas’uuliyiinta dadweynaha ee lagu helo inay ilaalinayaan ama awood u siinayaan shabakadaha daroogada si buuxda loola xisaabtami doono, isagoo hoosta ka xariiqay in cidna aysan ka sarreyn sharciga m.
Go’aanka cusub ee DCI wuxuu muujinayaa hab dhammaystiran oo aan tanaasul lahayn oo lagu ciribtirayo xadgudubka daroogada iyo maandooriyaha, iyadoo si cad loogu baaqayo midnimo u dhaxaysa hay’adaha amniga iyo dadweynaha si loo ilaaliyo mustaqbalka qaranka
Tan ayaa imaanaysa iyadoo Madaxweyne William Ruto uu ku dhawaaqay in maandooriyaha uu yahay xaalad degdeg ah oo qaran.
Waxaa uu madaxweyne Ruto soo jeediyay in ciddii lagu hela iibinta daroogada halista ah uu wajihi doono ciqaab dil ah .
