Saddex xubnood oo ka tirsan burcadda caanka ah ee ismaamulka Mombasa ee loo yaqaano Panga Boys, ayaa lagu soo qabtay howlgal ay sameeyeen ciidamada dambi baarista ee DCI-da.
Kooxdan burcadda ah ayaa dhac u gaysan jiray shacabka ku nool ismaamulka Mombasa, gaar ahaan deegaannada Kiembeni iyo Kadzandani.
Waxaa inta badan ay bartilmaameedsan jireen dadka kaligood socda iyo goobaha ganacsiyada.
Bayaan ay soo saartay waaxda dambi baarista ee DCI-da ayaa lagu xaqiijiyay howlgalka iyo xarigga saddexda tuhmanayaal.
Howlgalka ayaa ahaa mid ay iska kaashadeen dambi baarayaal ka socda gobolka Xeebta iyo koox gaar ah oo ka socotay xarunta dhexe ee DCI-da.
U jeedka howlgalkan ayaa ahaa in la ciribtiro kooxaha burcadda ah iyo in la soo celiyo ammaanka goobaha ay dhibaatooyinka ka dheceen.
Eedeysanayaasha ayaa magacyadooda lagu kala sheegay Shaban Munga Cali, Sande Kalama Kitsao iyo Shebani Charo Kalume, kuwaas oo laga soo qabtay meelo kala duwan.
Waxay da’adoodu u dhexeysa 24 ilaa 34 sano jir.
Munga iyo Kitsao ayaa lagu xiray fagaaraha Mwatamba 2 ee Kiembeni, halka Kalume laga soo qabtay Kadzandani.
Kalume ayaa markii la soo qabtay laga helay mindi iyo laba maaskaro oo ay saraakiisha uga shakisan yihiin in loo adeegsan jiray falal dambiyeedyo.
Saddexda eedeysanayaal ayay hadda baaritaanno ku socdaan, waxaana la filayaa in maxkamad la soo taago.
Waaxda dambi baarista ee DCI-da ayaa ku nuuxnuuxsatay in howlgalka uu wali socdo iyadoo maamulka uu sii wado dadaallada lagu burburinayo burcadda iyo xaqiijinta ammaanka dadka deggan Mombasa.
