Waxaa maanta lagu wadaa in magaalada Kismaayo ee xarunta gobolka Jubbada Hoose ka qabsoonto doorashada madaxweynaha cusub ee hoggaamin doona Jubbaland shanta sano ee soo socota.
Qaban-qaabadii ugu dambeysay ee doorashada madaxtinimada Jubbaland ayaa si weyn looga dhex dareemaya gudaha magaaladaas oo maanta ammaankeeda si weyn loo adkeeyay.
Musharraxiinta u tartameysa xilkan oo gaaraya ilaa afar musharax ayaa kala ah Axmad Maxamad Islaam (Axmed Madoobe) Faysal Maxamad Mataan, Abubakar Cabdi Xasan, Dr. Cabdi Xasan Xajiin.
Dadka Soomaaliyeed ee u dhuun daloolo arrimaha siyaasada ayaa aaminsan in doorashada maanta ka dhaceysa Kismaayo in markale dib loogu soo dooran doono Axmad Madoobe madaxweynaha Jubbaland.
Doorashada madaxtinimda Jubbaland ee maanta Kismaayo ka dhaceysa waxaa diidan dowladda fedaraalka Soomaaliya oo sheegtay in aanay aqbali doonin natiijo kasta oo ka soo baxda, waxaana xusid mudan in Jubbaland aysan dhag jalaq u siinin diidamada dowladda Fedaraalka oo ay ugu dambeyn maanta qabsaneyso doorashada madaxtinimo ee maamulkaas.
