Idaacadda militariga Israa’iil ayaa tabisay in kooxda Xisbullah ee dalka Lebanon ay weerar ka dhan ahaa Israa’iil u adeegsatay 340 isugu jira gantaallo iyo diyaaradaha aan duuliyaha lahayn.
Waxaa falkaasi ku dhaawacmay 11 qof.
Wararka ayaa intaasi ku daraya in weerarkaasi uu burbur xooggan gaarsiiyay magaalada Tel Aviv ee Israa’iil.
Xisbullah ayaa horay wacad ugu martay in ay gudaha Israa’iil ka gaysan doonto burbur la mid ah midkii laga soo tabiyay bartamaha magaalada Beirut ee dalka Lebanon.
Waxaa weli gudaha caasimadda Lebanon ee Beirut ka socda duqeymaha dhanka cirka ee Israa’iil.
Wasaaradda tacliinta ee dalkaasi ayaa ilaa bisha koowaad ee sanadka soo socdo hakisay howlaha waxbarashada.
Tan iyo markii uu billowday duullaanka militari ee Qaza waxaa dhanka kale gudaha Lebanon lagu dilay in ka badan 3,754 qof halka la dhaawacay 15,626 dheeraad ah.
