Laba gabdhood oo soomaali ah oo ay da’adoodu u dhexeyso 22 iyo 11 sano jir oo habeennimadii Isniinta ee toddobaadkan gurigooda ka baxay si ay u raadiyaan hooyadood oo la sheegay inay isbitaal aaday ayaa shalay meydadkooda laga kala helay meelo kala duwan oo ka tirsan caasimadda dalka ee Nairobi.
Hooyadood oo magaceeda lagu soo koobay Waris ayaa iyaduna lagu soo warramay in meydkeeda laga heley keyn ku taalla magaalada Machakos.
Waxaa hooyadan meydkeeda la dhigay isbitaalka heerka shanaad ee Machakos.
Labada gabdhood ee la dilay ayaa lagu kala magacaabi jiray Aamina Cabdirashiid Daahir iyo Nuseiba Cabdirashiid Daahir .
Meydadka hooyada iyo labada gabdhood oo ay dhashay ayaa la sheegay in ay ka muuqdeen dhaawacyo halis ah iyagoona laga jarjaray qaybo ka mid ah jirkooda.
Haweeney ka mid ah qoyska marxuumiinta la dilay ayaa warbaahinta uga warbixisay dhacdadan oo ay dadka deegaanka ka argagaxeen.
