Madaxweyne ku xigeenka dalka Rigathi Gachagua ayaa sheegay in dowladdu ay mudnaan siisay dardargelinta mashaariicda horumarineed ee laga fulinaya Waqooyiga dalka oo ay ka mid yihiin ismaamullada gobolka Waqooyi Bari ee Garissa, Wajeer iyo Mandera.
Waxaa uu hoosta ka xarriiqay in iyadoo la kaashanaya saaxiibbada Kenya in hindisaha horumarka ee NEDI uu fulinaya mashaariic ay ku baxaysa 300 oo bilyan oo shilin.
Ujeeddada arrintan laga leeyahay ayuu Gachagua ku sheegay in deegaannada xoolo dhaqatada laga sameeyo horumar dhaqaale iyo mid bulsho labaduba.
Waxaa uu xusay in dowladda ay kaashanaysa Bangiga Adduunka iyo hay’adaha kale iyadoo dhaqangelinta mashaariicdan ay maraysa heerar kala duwan.
Arrintan ayuu ka sheegay kulan wada tashi ahaa oo ku saabsanaa barnaamijka NEDI oo lagu qabtay ismaamulka Nairobi.
Ismaamullada ka faa’iidaya barnaamijkan waxaa ka mid ah Galbeedka Pokot, Turkana, Samburu, Isiolo, Marsabit, Tana River, Lamu, Garissa, Wajeer iyo Mandera.
Mashaariicda la fulinaya ayaa la xiriira gaadiidka, wax soo saarka beeraha, biyaha, caafimaadka, waxbarashada, tamarta, badbaadinta bulshada iyo kuwo kale.
Dhanka gaadiidka waxaa ka mid ah, dhisidda waddo wayn oo ah ilaa 740 kiilomitir oo isku xiraysa Isiolo-Wajeer ilaa Mandera.
Sidoo kale, waxaa la hirgelinaya sayladaha xoolaha laga dhoofiyo ee Isiolo, dib u dayactirka machadka tababarka ee culuunta dhaqashada xoolaha ee Wajeer iyo in la qodo ilaa 400 oo ceelal ah.
