Dowladda Soomaaliya ayaa xirtay dhammaan Warbaahinta Intarneetka ee Website-yada ay isticmaalaan kooxda Al-Shabaab.
Go’aan ka soo baxay Wasaaradda Boostada iyo Isgaarsiinta Xukumadda federaalka ee Soomaaliya ayaa lagu faray Shirkadaha Isgaarsiinta inay ka qayb qaataan ilaalinta Amniga Qaranka, iyadoo la xiganayo qodobka 66-aad ee Sharciga Isgaarsiinta oo ku waajibaya dhammaan shirkadaha shatiga u haysta bixinta Isgaarsiineed.
Dowladda Soomaaliya ayaa hore u qaadatay istaraatiijiyad cusub oo ka dhan ah Al-Shabaab, si loola dagaallamo dhaqaale ahaan iyo sidoo kale ciidan ahaan, waxaana haatan ku soo biiray dhinaca warbaahinta iyo baraha bulshada oo ay ka mamnuucday faafinta fariimaha iyo wararka Shabaab.
