Xoghayaha Guud ee dalladda ay ku mideysan yihiin ururrada shaqaalaha ee COTU ,Francis Atwoli ayaa madaxweynaha dalka William Ruto ugu baaqay inuu xakameeyo isticmaalka baraha bulshada ee gudaha Kenya.
Atwoli oo tusaale u soo qaatay Shiinaha ayaa hoosta ka xarriiqay in tani ay gacan ka gaysanaysa aamusiinta codadka aan waddaniyadda ku saleysnayn si loo xoojiyo xasilloonida qaranka.
Waxaa uu baaqan jeediyay xilli maanta loo dabbaal degayay maalinta adduunka ee shaqaalaha iyo sanadguuradii 60-aad ee ka soo wareegatay aasaaska COTU.
Hadalka Atwoli ayaa imaanaya iyadoo dowladda lagu eedeyay caburinta dhaliilaha ka dhanka ah ee baraha bulshada.
Hasa ahaate, qaar ka mid ah dadka isticmaala baraha ay bulshada ku wada xiriirto ayaa Xoghayaha Guud ee COTU , Francis Atwoli ku eedeyay inuu taageeraya dadaallada lagu saameeyo xurriyatul qowlka.
Atwoli ayaa ku baaqay in madaxweynaha fursad loo siiyo inuu dhameysto muddo xileedkiisa isagoo kula taliyay in aan marnaba la cabsi gelin.
