Dhaxal sugaha Sacuudiga Maxamed Bin Salmaan ayaa fiidnimadii xalay ku qaabilay Qasriga Al-Salam ee magaalada Jeddah Ra’iisul Wasaaraha waddanka Hindiya Narendra Modi.
Xaflad soo dhaweyn ah oo rasmi ah ayaa loo sameeyay Modi, waxaana labada hogaamiye ay yeesheen fadhi wadahadal ah, sida ay ku warantay wakaalada wararka Sacuudiga.
Amiir Maxamed iyo Modi ayaa sidoo kale guddoomiyey shirka Golaha Iskaashiga Istiraatiijiyadeed ee Sacuudiga iyo Hindiya.
Tani waa safarkii seddexaad ee Modi uu ku tago Sacuudiga kadib booqashooyinki sanadihii la soo dhaafay 2016 iyo 2019-kii.
Booqashada Modi ayaa la filayaa in lagu arko dhowr heshiis oo is afgarad ah oo la kala saxiixday.
Dhaxalsugaha Boqortooyada ayaa sidoo kale muujiyay sida uu uga xun yahay weerar lagu dilay dad dalxiisayaal ah oo ku sugnaa Gobolka Kashmir qeybta ay Hindiya maamusho.
