Ciidamada Israa’iil ayaa markii labaad todobaad gudihiis weerar ku qaaday magaalada Beirut ee caasimadda dalka Lubnaan halkaasi oo ay ku dileen ugu yaraan 3 qof, isla markaana ay halis gelisay heshiiska xabbad joojintii oo ay kula jiraan Xisbullah.
Dhanka kale kumanaan Falastiiniyiin ah ayaa ka qaxaya magaalada Rafah ee koonfurta Qaza ka dib markii ciidamada Israa’iil ay amar ku bixiyeen in la baneeyo ku dhawaad magaalada oo dhan isla markaana ay weeraro culus ku qaadeen deegaankaasi.
Falastiiniyiinta ku sugan Qaza ayaa aas u sameeyay 15 ka mid ah shaqaalaha gurmadka degdega ah oo ay ciidamada Israa’iil ku dileen xilli ay isku dayayeen inay badbaadiyaan dad rayid ah oo dhaawacmay 23-kii bishii March.
Wasaaradda caafimaadka ee Qaza ayaa xaqiijisay in ugu yaraan 50,357 qof lagu dilay dagaalka Israa’iil ee Qaza tan iyo 7-dii bishii Tobnaad ee sanadkii 2023-kii halka lagu dhaawacay 114,400 kale oo Falastiniyiin ah.
Xafiiska warbaahinta Xukuumadda Qaza ayaa tiradan u cusboonaysiiyay in ka badan 61,700, isaga oo sheegay in kumannaan qof oo lagu la’yahay burburka hoostiisa loo malaynayo inay dhinteen.
