Ciidamada booliiska ee ismaamulka Nyeri ayaa gacanta ku dhigay maadada Ethanol oo uu qiimaheeda lacageed yahay 500,000 oo shilin taasoo lagu soo saaro khamriga sharci darrada ka ah gudaha wadanka.
Maadadan ayaa lagu qabtay tuulada Barguret ee bariga deegaanka Kieni ee xigta dhanka Nanyuki.
Guddoomiye ku xigeenka dowladda dhexe ku matalo bariga ismaamulka Laikipia ,Patrick Muli ayaa sheegay in ciidamada ammaanka ay xog ka heleen dadweynaha ka dibna ay howlgalka sameeyeen.
Muli ayaa dhanka kale shacabka uga digay isticmaalka khamriga.
Waxaa uu intaasi ku daray inay qabaan tuhun ah in maadada ethanol-ka ee la qabtay laga keenay dhanka Nakuru.
Waxaa uu dadweynaha ugu baaqay inay saraakiisha ammaanka la soo wadagaan xogaha ay hayaan si loogu guulaysto dagaalka ka dhanka ah khamriga sharci darrada ah ee gobolka bartamaha dalka.
