Dowladda militariga ee hoggaamiso wadanka Burkina Faso ayaa sheegtay in iyadoo la adeegsanaya xogaha sirdoonka laga hor tagay iskuday afgembi.
Bayaan laga akhriyay telefishinka dowladda ee wadankaasi ayaa lagu sheegay in adeegyada amniga ay kaalin ka qaateen in qorshahan uu fashilmo.
Sidoo kale waxaa gacanta lagu dhigay saraakiil iyo shakhsiyaad kale oo ku eedeysan iskudayga afgembi halka kuwo dheeraad ah la raadinaya.
Dadkan ayaa loo haystaa inay damacsanayeen inay weeraraan hay’adaha dowladda Burkina Faso si ay qalalaase u abuuraan.
30-kii bishii Sagalaad ee sanadkii hore ayay ahayd markii hoggaamiyihii militariga ee dalkaasi Ibrahim Traoré uu hoggaanka la wareegay.
Dhacdadaasi ayaa ahayd inqilaabkii labaad ee Burkina Faso laga soo tabiyay muddo Siddeed bilood gudaheeda ah.
