Dowladaha Ruushka iyo Shiinaha ayaa saxiixday heshiisyo iskaashi in kastoo ay dhaliil uga imaanaysa dhanka reer galbeedka.
Ra’iisul Wasaaraha Ruushka Mikhail Mishustin ayaa sheegay in cadaadiska xasaradda ku saleysan ee ay kala kulmayaan reer galbeedka uu xiriirka Ruushka iyo Shiinaha gaarsiinaya heer sarreeya oo aan horay loo arag.
Dareenkan ayuu Mishustin muujiyey ka dib kulan uu maanta la qaatay dhigiisa Shiinaha Li Qiang .
Kulanka oo qabsoomay caasimadda Shiinaha ee Beijing ayay labada mas’uul ku wada saxiixdeen heshiisyo ay xukuumadahooda iskaga kaashanayaan dhanka ganacsiga iyo cayaaraha.
Ra’iisul Wasaaraha Ruushka ayaa sidoo kale la kulmay madaxweynaha Shiinaha Xi Jinping.
Iskaashiga ganacsi ee labada dal u dhexeya ayaa sanadkii hore gaaray qiimo lacageed oo dhan 190 bilyan oo doolar sida laga soo xigtay waaxda kastamka ee Shiinaha.
