Madaxweynaha dalka William Ruto ayaa muslimiinta kenyaanka ah u diray hambalyo la xiriirta munaasabadda ciidul fidriga ee maanta loo dabbaal degaya.
Qoraal uu soo dhigay bartiisa rasmiga ee Twitter-ka ayuu ku sheegay inuu Alle ka rajeynaya inuu muslimiinta ka aqbalo soonka , salaadaha, sadaqada iyo acmaasha kale ee wanaagsan oo uu nabad ku gaarsiiyo ramadaanka kale iyagoo caafimaad qaba.
Sidoo kale bayaan ka soo baxay xarunta madaxtooyada ee State House ayaa lagu sheegay in madaxweynaha uu garab istaag u muujinaya shacabka Suudaan .
William Ruto ayaa xusay in dagaallada geeska Afrika ay sababeen dhibaatooyin baniaadannimo iyadoo fursado badan la lumiyey sidaas awgeedna si wayn loogu baahi qabo xasilooni.
Madaxweyne William Ruto ayaa intaasi ku daray in dowladda Kenya ay diyaar u tahay inay kaalinteeda ka qaadato sidii lagu heshiisiin lahaa dhinacyada ku dagaallamaya wadanka Suudaan.
Sidoo kale waxaa uu ciidamada militariga ee Suudaan iyo saraakiisha RSF ka codsaday inay taageeraan dadaallada nabadeynta ee ay wadaan IGAD, AU-da, Qaramada Midoobay iyo dhinacyada kale oo ayna isugu yimaadaan miiska wada hadalka.
