Wasiirka wasaaradda arrimaha gudaha iyo maamulka qaran Prof. Kithure Kindiki ayaa xilli uu ku sugnaa deegaanka Kiambaa ee ismaamulka Kiambu waxaa uu sheegay in dowladda dhexe ay si wayn ula dagaallami doonto ka ganacsiga maandooriyaha ee saameynta ku yeeshay nolosha da’yar badan.
Waxaa uu wacad ku maray in dowladda wax kasta oo ay ku qaadataba ay dabargoyn doonto ganacsigan.
Kindiki ayaa carrabka ku adkeeyay in gobolka bartamaha wadanka laga billaabi doono howlgal culus oo ka dhan ah balwadda.
Waxaa uu xusay in saraakiisha ammaanka ay adeegsan doonaan awood la mid ah midda ay kula tacaalayaan falalka burcadnimo iyo dhaca xoolaha ee ka jiro deegaannada xoolo dhaqatada.
Kindiki ayaa siyaasiyiinta iyo saraakiisha maamulka ee dowladda dhexe uga digay inay isaga la xiriiraan iyagoo codsanaya in la siidaayo qof loo xiray ka ganacsiga maandooriyaha.
