Ku xigeenka madaxweynaha dalka Rigathi Gachagua ayaa sheegay inuu barasaabka ismaamulka Nairobi Johnson Sakaja kala hadli doono qorshaha uu ku doonaya in bartamaha caasimadda wadanka laga saaro gaadiidka dadweynaha ee loo yaqaano mataatuuda.
Waxaa uu xusay in tallaabadan ay saameyn ku yeelan karto ganacsiga sidaas awgeedna aan loo baahneyn in lagu degdego.
Gachagua ayaa xilli uu ku sugnaa Nyeri carrabka ku adkeeyay in guddoomiyaha Nairobi looga baahan yahay inuu wada tashi sameeyo ka hor inta uunan arrintan ku dhaqaaqin.
Waxaa uu dhanka kale soo dhaweeyay tallaabo ay barasaabka Nakuru , Susan Kihika mataatuuda dib ugu soo celisay bartamaha magaalada Nakuru oo uu horay uga saaray Lee Kinyanjui.
Bishii hore ayay ahayd markii guddoomiyaha Nairobi Johnson Sakaja oo shir la qaatay madaxda shirkadaha gaadiidka dadweynaha ee PSVs uu shaaciyay inuu jiro qorsho lagu yareynaya ciriiriga dhanka isku socodka gaadiidka ee ka jiro gudaha magaala madaxda wadanka.
