Shaqaalaha jaamacadda Egerton oo ka cabanaya musharaad aan weli la siin ayaa sheegay in toddobo cisho ka dib ay shaqo joojin ku dhaqaaqi doonaan.
Waxaa arrintan ku dhawaaqay xoghayaha guud ee ururka shaqaalaha jaamacadaha dalka ee (KUSU) Charles Mukhwaya.
Mas’uulkan ayaa xusay in maamulka jaamacadda Egerton uu sidoo kale ku fashilmay inuu dhaqangeliyo heshiis gorgortan ku saleysnaa oo la gaaray.
Waxaa uu Charles Mukhwaya carrabka ku adkeeyay in howlwadeennada ay ku shaqeeyaan jawi aan waafaqsanayn midka ay dejisay hay’adda caalamiga ee shaqada ee ILO oo ay Kenya xubin ka tahay.
Mukhwaya waxaa uu sheegay inay qasab tahay in sida ugu dhaqsiyaha badan howlwadeennada jaamacadda loo siiyo boqolkiiba boqol ee musharaadkooda.
