Madaxa xisbiga KANU ahna senatarka ismaamulka Baringo Gideon Moi ayaa qoraal uu soo dhigay bartiisa rasmiga ee Twitter-ka ku sheegay in xisbi ahaan ay weli ka mid yihiin isbeheysiga Azimio.
Waxaa uu xusay in ka mid ahaanshaha KANU ee Azimio La Umoja ay tahay mid sugan oo aan laga laaban doonin.
Mr. Moi ayaa sheegay inay diyaar u yihiin inay cid kasta soo dhaweeyaan si uu 9-ka bisha Siddeedaad ee sanadkan uu hoggaanka dalka ugu guulaysto Raila Odinga.
Xubnaha ka tirsan xisbiga KANU ayuu Gideon Moi kula taliyay inaynan marnaba ka lala-labeyn taageeridda Mr. Odinga.
Tani ayaa imaanaysa maalmo un ka dib markii madaxa xisbiga Wiper Kalonzo Musyoka oo ay KANU ka wada tirsanayeen isbeheysiga OKA uu shaaciyay inuu Azimio iskaga baxay maadaama aan loo soo xulan ku xigeenka Raila Odinga.
