Waxaa maanta la filayaa in ay maxkamadda ka soo hormuuqdaan shakhsiyaad lagu tuhunsan yahay dil dhawaan loo gaystay Caroline Wanjiku Maina oo 38 sano jir ahayd.
Haweeneydan ayaa meydkeeda la helay Jimcihii hal toddobaad ka dib markii la waayay.
Ciidamada booliska ayaa sheegay in meydka Caroline lagu arkay goobta meydadka la dhigo ee isbitaalka Kajiado.
Maalmo ka hor ayaa sidoo kale la helay baabuurkeeda oo looga tagay xaafadda Kawangware ee magaalada Nairobi gaar ahaan meel u dhow dugsiga hoose dhexe ee Gatina hal maalin oo la raadinayay ka dib.
Eedeysanayaasha maanta la maxkamadeynayo ayaa kala ah Edwin Otieno Odiwuor, Samwel Okoth Adinda, Stevenson Oduor Ouma iyo Mercy Gitiri Mongo.
Laamaha ammaanka ayaa rumeysan in dadkan ay iska kaashadeen dhibaateyn iyo dil ugu dambeyn loo gaystay Caroline Wanjiku Maina.
