Guddoomiye ku xigeenka golaha qaran ee xeer dejinta Moses Cheboi ayaa dib u dhigay ansaxinta hindise sharciyeed muran dhaliyay.
Hindisaha ayaa ku saabsan isbeddel lagu sameeyay xeerarka xisbiyada siyaasadeed ee wadanka.
Waxaa uu soo jeedinaya in xisbiyada siyaasadeed ee wadanka ka jiro laga dhigo isbeheysiyo tani oo suurtagelinaysa inay qaybsadaan dhaqaalaha ka dhexeya.
Hasa ahaate ku xigeenka guddoomiyaha baarlamaanka Moses Cheboi ayaa hakad geliyay doodda ka dib markii xildhibaanada ay si wayn ugu kala qaybsameen oo ay xakameyntooda adkaatay.
Siyaasiyiinta taageersan heshiiskii madaxweyne Uhuru Kenyatta iyo madaxa xisbiga ODM Raila Odinga ayaa Cheboi ku eedeyay inuusan arrinkan dhexdhexaad ka noqon.
Guddoomiye ku xigeenka ayaa shaaciyay in doodda mar kale la qaban doono ka hor dhammaadka sanadkan ka dib marka hoggaanka baarlamaanka uu wada tashi sameeyo.
