Hoggaamiyeyaasha mucaaradka Kenya ayaa dowladda ku eedeeyay dayacaad iyo inaysan lahayn qorshe cad oo wax ku ool ah oo looga hortagayo in fayraska Ebola uu dalka soo galo.
Intii uu ku guda jiray booqasho uu ku marayay magaalada Mombasa, hoggaamiyaha xisbiga Wiper, Kalonzo Musyoka, iyo hoggaamiyeyaal kale oo mucaarad ah ayaa ugu baaqay Mareykanka iyo saaxiibada kale ee horumarinta inay si dhow ula socdaan sida loo isticmaalo lacagaha ay Kenya siiyaan, si loo hubiyo inay ka faa’iideystaan shacabka dalka.
Hoggaamiyeyaashan oo maalintii labaad booqasho ku joogay Mombasa ayaa booqday deegaannada Junda iyo Shanzu ee deegaanka doorashada Kisauni. Waxay sidoo kale dhaliileen madaxweyne William Ruto, iyaga oo ku eedeeyay inuu ku guuldarreystay dejinta qorshayaal wax looga qabanayo isbeddelka cimilada, xilli dalka laga xusayay maalinta qaran ee deegaanka ee Mazingira Day.
Kalonzo ayaa ugu baaqay saaxiibada horumarinta, oo uu ku jiro Mareykanka, inay si dhow ula socdaan qaabka loo maareeyo lacagaha ay Kenya siiyaan. Waxa uu maamulka Kenya Kwanza ku eedeeyay musuqmaasuq iyo ku takrifal dhaqaale.
Iyadoo dalka laga xusayay maalinta qaran ee deegaanka, mucaaradku waxay dhaliileen dowladda, iyaga oo beeniyay sheegashooyinka ah in horumar muuqda laga sameeyay beerista dhirta iyo ilaalinta deegaanka.
Hoggaamiyeyaashu waxay ku eedeeyeen in barnaamijka beerista dhirta uu hareeyay musuqmaasuq, halka qaybaha kale ee muhiimka ah ee dhaqaalaha ay weli wajahayaan caqabado waaweyn.
Macnaha hadalkiisa ayaa ahaa: “Qorshe noocee ah ayay dejiyeen si loo hubiyo in hooyooyinka halkan ku nool aysan daadadku saameyn, iyaga oo haddana sheeganaya inay geedo beereen?”
Dhankiisa, ku-xigeenka hoggaamiyaha xisbiga Wiper, Mohammed Ali, ayaa sheegay in dadka Mombasa aysan haysan kaabayaal aasaasi ah oo ku filan.
Dhanka kale, magaalada Garissa, hoggaamiyaha xisbiga People’s Renaissance Movement (PM), Caleb Amisi, ayaa mucaaradka ugu baaqay inay ku midoobaan hal musharrax oo madaxweyne si uu ula tartamo madaxweyne William Ruto doorashada guud ee soo socota.
