Guddiga Qaranka ee Isku-xirka iyo Wadajirka Bulshada dalka, NCIC, ayaa u yeertay Xildhibaan Peter Kaluma oo laga soo doorto Homa Bay Town, kaddib hadallo la sheegay inuu ka jeediyay kulan siyaasadeed oo ka dhacay Homa Bay.
Xildhibaanka ayaa lagu amray inuu hor yimaado guddiga NCIC, xaruntiisa Britam Towers ee Upper Hill, Nairobi, maalinta Arbacada, 19-ka Agoosto, saacadda 10-ka subaxnimo, si uu uga qeyb qaato baaritaanka socda ee ku saabsan hadallada uu jeediyay 15-kii Agoosto.
NCIC ayaa sheegtay in baaritaanku la xiriira eedeymo ku saabsan hadallo loo fasiran karo naceyb iyo kicin siyaasadeed, kuwaas oo halis gelin kara wadajirka iyo is-dhexgalka bulshada Kenya.
Guddiga ayaa sheegay in hadallada xildhibaanka, marka loo turjumo Ingiriisiga, ay u muuqdeen kuwo ku baaqaya in lala beegsado dadka loo arko inay taageersan yihiin dhinaca siyaasadeed ee mucaaradka.
NCIC ayaa sidoo kale sheegtay in Kaluma uu ku baaqay in la baaro hoteellada iyo guryaha ku yaalla Homa Bay, si loo ogaado dadka xiriirka la leh dhinaca siyaasadda ee kasoo horjeeda.
Guddigu wuxuu xusay in xildhibaanku sidoo kale digniin u jeediyay dadka taageeraya in Madaxweyne William Ruto uu xilka madaxweynaha qabto hal muddo oo keliya.
NCIC ayaa u yeertay Kaluma iyadoo adeegsanaysa qodobo ka tirsan Sharciga Isku-xirka iyo Wadajirka Qaranka, kuwaas oo guddiga siinaya awood uu ku baaro, kuna qaado tallaabo sharci ah marka ay jiraan falal ama hadallo khatar gelin kara wadajirka qaranka.
Baaritaanka guddiga ayaa hadda socda, waxaana la sugayaa jawaabta iyo faahfaahinta Xildhibaan Peter Kaluma marka uu hor yimaado NCIC.
