Wasiirka Iskaashatooyinka, Wycliffe Oparanya, ayaa meesha ka saaray inuu ka baxayo xisbiga ODM si uu u dhiso ama ugu biiro xisbi siyaasadeed oo matala gobolka Galbeedka Kenya. Wuxuu sheegay inuu weli daacad u yahay hoggaamiyaha ODM, Raila Odinga.
Isagoo ka hadlayay Axaddii munaasabad ay si wadajir ah u qabteen ODM iyo UDA oo ka dhacday deegaanka Malava ee ismaamulka Kakamega, Oparanya wuxuu sheegay inuu diiday baaqyo uga yimid qaar ka mid ah siyaasiyiinta oo doonayay in hoggaamiyeyaasha Galbeedka Kenya ay ka baxaan ODM, iyagoo ku andacoonaya in xisbiga uu hadda u badan yahay hoggaamiyeyaal Luo ah.
Wasiirku wuxuu sheegay inuusan ka tagi karin Raila Odinga, oo uu ku tilmaamay qofka door weyn ka qaatay koboca iyo safarkiisa siyaasadeed.
Oparanya wuxuu sheegay in dad badan ay ula yimaadeen soo jeedin ku saabsan in la sameeyo xisbi siyaasadeed oo u gaar ah Galbeedka Kenya, iyagoo ku doodaya in ODM uusan mar dambe metelin danaha gobolka.
Hase yeeshee, wuxuu sheegay inuu si cad u diiday fikraddaas, isagoo xusuusiyay in hoggaamiyeyaal ka soo jeeda Galbeedka Kenya ay ka mid ahaayeen aas-aasayaashii ODM sanadkii 2005.
Wuxuu intaas ku daray in go’aanka lagu sii joogayo ODM uu yimid kadib wadatashi uu la yeeshay hoggaamiyeyaal kale, kuwaas oo dhammaantood isku raacay inaysan ka bixin xisbiga.
Hadalladan ayaa kusoo beegmaya xilli ay socdaan isbahaysiyo iyo dib-u-habeyn siyaasadeed oo ka dhex jirta dowladda wadajirka ah ee u dhaxaysa xisbiga UDA ee Madaxweyne William Ruto iyo ODM, iyadoo labada dhinacba ay kordhiyeen isu soo baxyo iyo kulammo siyaasadeed oo ay si wadajir ah u qabanayaan, iyagoo isu diyaarinaya doorashada guud ee 2027.
Isu soo baxii Malava waxaa Oparanya ku weheliyay Xoghayaha Guud ee ODM, Catherine Omanyo, Agaasimaha Doorashooyinka iyo Ololaha ee ODM, Junet Mohamed, iyo hoggaamiyeyaal kale oo deegaanka ah. Waxay shacabka ugu baaqeen inay taageeraan dowladda wadajirka ah.
Junet Mohamed, oo isna halkaas ka hadlay, ayaa sheegay in ODM ay ka wada xaajoon karto jagada madaxweyne ku xigeenka haddii ay heshiis siyaasadeed la gaarto Madaxweyne William Ruto doorashada 2027.
Wuxuu sheegay in ODM ay hiigsanayso inay dowladda la sameyso Ruto kadib doorashada guud ee soo socota, isagoo tilmaamay in haddii UDA ay sii haysato madaxtinimada, ODM ay dalban doonto jagada madaxweyne ku xigeenka.
Junet ayaa sidoo kale taageeray Wycliffe Oparanya inuu noqdo musharrax ku habboon jagadaas, isagoo ku ammaanay sannadihii dheera ee uu u soo adeegayay ODM iyo xiriirka dhow ee wada shaqeyneed ee kala dhexeeya Raila Odinga.
