Xabbad joojintii jilicsaneyd ee dagaalka Iiraan iyo Mareykanka ayaa Jimcaha maanta ah wajahday xiisad cusub ka dib markii Imaaraadka Carabta ay ka jawaabtay weerar loo adeegsaday gantaallo iyo diyaaradaha aan duuliyaha lahayn. Weerarkan ayaa dhacay saacado ka dib markii Maraykanka uu sheegay inuu ka hortagay weerarro lagu qaaday saddex markab oo ciidamada badda ah oo marayay marin biyoodka Hormuuz, isla markaana uu weerarro jawaab celin ah ku qaaday xaruumo militari oo Iiraan leedahay.
Rabshadaha cusub ayaa halis geliyay heshiiskii xabbad joojinta ee u dhexeeyay Iiraan iyo Maraykanka, xilli labada dhinac ay wali ka fikirayeen heshiis rasmi ah oo lagu soo afjaro dagaalka. Xiisadda sii kordheysa ayaa abuurtay cabsi ah in dagaalka uu mar kale si buuxda u qarxo.
Wasaaradda difaaca ee Imaaraadka Carabta ayaa shacabka uga digtay inay u dhowaan ama taabtaan burburka iyo haraadiga ka dhashay gantaallada iyo diyaaradaha aan duuliyaha lahayn ee hawada lagu qabtay. Dowladda ayaa sheegtay in tallaabooyinka difaaca cirka ay si guul leh u fashiliyeen weerarradaas.
