Ugu yaraan shan qof ayaa lagu dilay, toddobo kalena waa lagu dhaawacay weerarro ay ciidamada Israa’iil ka fuliyeen Qaza 24-kii saac ee la soo dhaafay, sida ay sheegtay Wasaaradda Caafimaadka Falastiin.
Wasaaradda ayaa intaa ku dartay in tan iyo markii la sheegay xabbad joojinta bishii October ee sanadkii hore, ay dhinteen 823 qof, halka 2,308 kalena ay ku dhaawacmeen weerarrada socda.
Tan iyo markii Israa’iil ay bilowday dagaalka Qaza bishii October 2023-kii, tirada guud ee dhimashada ayaa gaartay 72,599 qof, halka dhaawacyaduna ay kor u dhaafeen 172,411 qof oo ku nool deegaanka go’doonsan.
Xaaladda bini’aadantinimo ee Qaza ayaa weli aad u liidata, iyadoo shacabka ay wajahayaan dhibaatooyin isugu jira weerarro joogto ah, adeegyo caafimaad oo xaddidan iyo baahi aad u weyn oo dhinaca gargaarka ah.
