Hoggaamiyeyaasha xisbiga United Democratic Alliance (UDA) ee ka soo jeeda gobolka Xeebta ayaa ku eedeeyay madaxweynihii hore ee dalka Uhuru Kenyatta inuu la shaqeynayo siyaasiyiin la safan Orange Democratic Movement (ODM) si loo wiiqo dowladnimada madaxweyne William Ruto.
Arrintan ayaa lagu sheegay kulan dhaqaale loogu ururinayay haweenka oo lagu qabtay dugsiga hoose ee Milalani ee ku yaalla Msambweni ee dowlad deegaanka Kwale. Xoghayaha guud ee UDA, Xasan Cumar, ayaa ku eedeeyay Uhuru inuu isku dayayo inuu saameyn ku yeesho hoggaanka dalka isagoo taageeraya musharraxiin suuragal ah ka hor doorashada guud ee soo socota.
Xasan ayaa ugu baaqay ODM inay si hore u caddeyso jihada siyaasadeed ee ay qaadaneyso, isla markaana ay go’aan ka gaarto inay taageeri doonto dib u doorashada Ruto ee 2027 ama ay mucaarad ahaan sii joogi doonto. Waxaa uu sheegay in isbeddelka isbahaysiyada siyaasadeed, gaar ahaan Waqooyiga dalka, uu sababi karo in xisbiyada mucaaradka ay ka harraan haddii ay dib u dhigaan go’aannadooda.
Ku xigeenka hoggaamiyaha xisbiga UDA isla markaana ah barasaabka Lamu, Ciisa Timamy, ayaa muujiyay kalsooni ah in gobolka Xeebta uu si weyn u taageeri doono Ruto doorashada soo socota, isagoo tixraacay mashaariic horumarineed oo socda.
