Dowladda ayaa 90 maalmood gudahood soo saari doonta warqadda lahaanshaha Suuqa Gikomba ee magaalada Nairobi, sida uu ku dhawaaqay madaxweynaha dalka William Ruto.
Madaxweynaha ayaa sheegay in suuqa uu ku yaallo dhul dadweyne, isla markaana bixinta warqadda lahaanshaha oo lagu qorayo magaca ismaamulka Nairobi ay si rasmi ah u xallin doonto muranka ku saabsan cidda iska leh dhulkaas.
Ruto ayaa faray Wasiirka Dhulka, Alice Wahome, iyo Xoghayaha Guud ee wasaaradda, Nixon Korir, inay la shaqeeyaan Guddiga Qaran ee Dhulka si warqadda lahaanshaha loogu wareejiyo dowlad deegaanka Nairobi.
Madaxweynaha ayaa xusay in tallaabadan ay meesha ka saari doonto mala awaalka iyo faragelinta kooxaha ku lugta leh boobka dhulka. Waxaa uu sidoo kale ku dhawaaqay in la dhisi doono wajiga saddexaad ee Suuqa Gikomba, kaas oo la bilaabi doono marka la dhammeeyo wajiga labaad.
Hadalladan ayuu ka jeediyay kulan uu la yeeshay ganacsatada Suuqa Gikomba oo ka dhacay Aqalka Madaxtooyada ee Nairobi, Talaadadii shalay.
Kulanka ka hor, hoggaamiyaha qaranka ayaa sidoo kale la kulmay guddoomiyeyaasha iyo guddiyada suuqyada kale ee ku yaalla ismaamulka Nairobi, kuwaas oo ay ka mid yihiin Kangundo Road, Wakulima, Muthurwa, Burma, Kangemi, City Park, Othaya (Woodley Jamuhuri) iyo Kawangware.
Madaxweynaha ayaa sheegay in dowladda qaranka ay si dhow ula shaqeynayso tan Nairobi si wax looga qabto dhibaatooyinka la xiriira qashinka iyo maareynta nadaafadda magaalada. Waxaa uu tilmaamay in dowladda dhexe ay taageerayso Nairobi si loo helo xal waara oo dhammeystiran oo lagu wajahayo caqabadahaas.
Sidoo kale, Madaxweynaha ayaa sheegay in dowladda ay la shaqeyn doonto ismaamulka si loo ballaariyo helitaanka korontada ee suuqyada iyo guud ahaan magaalada. Waxaa uu ugu baaqay hoggaanka suuqyada inay gacan ka geystaan ciribtirka isku xirka korontada sharci darrada ah ee ka jira suuqyada.
