Ururrada xuquuqda aadanaha ayaa Hay’adda madaxa bannaan ee kormeerta howlaha booliiska ee IPOA u qabtay 7 maalmood oo kama dambeys ah, iyagoo ka dalbaday in ay si cad u shaaciso halka ay marayaan baaritaannada ku saabsan toogashadii keentay geerida wiil 14 jir ah oo lagu dilay magaalada Mombasa habeenkii Sannadka Cusub.
Ururrada ayaa ka digeen in haddii toddoba maalmood gudahood aan la qaadin tallaabo muuqata, isla markaana aan cidna la xirin, ay abaabuli doonaan fariisin ay ka dhiganayaan bannaanka xafiisyada IPOA. Waxaa ay ku adkaysteen in dadkii ka dambeeyay dilka Dennis Ringa lala xisaabtamo.
Dennis Ringa, oo ahaa arday fasalka lixaad dhigta, ayaa la toogtay habeenkii 31-ka Diseembar ee xaafadda Utange, oo ah deegaan si weyn loo deggan yahay oo ku yaalla duleedka Mombasa. Sida ay sheegeen qoyska iyo goobjoogayaal, wiilka ayaa bannaanka joogay isaga iyo carruur kale, iyagoo shiddayay rash si ay ugu dabaaldegaan bilowga sanadka cusub.
Baaritaan meydka lagu sameeyay ayaa muujiyay in Dennis laga toogtay dhabarka, rasaastuna ay ka gashay dhabarka kana baxday xabadka, arrintaas oo dhalisay su’aalo culus oo ku saabsan sida awoodda dilka ah loogu adeegsaday ilmo yar.
Dhaqdhaqaaqayaasha xuquuqda aadanaha ayaa sheegay in maqnaanshaha xarigyo toddobaadyo ka dib ay sii xoojisay xanuunka qoyska, isla markaana wiiqday kalsoonidii dadweynaha ee hay’adaha loo xilsaaray kormeerka booliska.
IPOA, oo sharci ahaan u xilsaaran baarista dhimashada iyo dhaawacyada culus ee ka dhasha falalka booliiska, ayaa hore u sheegtay in ay wado baaritaanno la xiriira dhacdadan, balse weli ma soo saarin warbixin faahfaahsan, mana caddeyn in askar la wareystay ama tallaabo laga qaaday.
Dhacdadan ayaa kusoo beegmeysa xilli ay jiraan walaacyo soo jireen ah oo ku saabsan adeegsiga xoogga ee booliiska dalka, gaar ahaan xaafadaha dakhligooda hooseeyo. Ururrada xuquuqda aadanaha ayaa ku doodaya in dib u dhacyada baaritaanada iyo maxkamadeynta ay sii xoojiyeen jawi aan lala xisaabtamin.
