Xisbiga Orange Democratic Movement (ODM) ayaa go’aansaday inuu si degdeg ah u bilaabo wadahadallo hordhac ah oo ku saabsan isbahaysi siyaasadeed oo ka horreeya doorashada guud ee 2027, kuwaas oo uu la yeelanayo xisbiga talada haya ee United Democratic Alliance (UDA). Go’aanka ayaa lagu gaaray kulan Guddiga Maamulka Dhexe ee xisbiga (CMC) oo ka dhacay ismaamulka Kilifi, waxaana shir-guddoominayay hoggaamiyaha xisbiga Dr Oburu Odinga ahna senatorka dowlad deegaanka Siaya.
Guddiga ayaa isku raacay in la bilaabo wadaxaajoodyo nidaamsan oo lala galo xisbiyo kale, iyadoo UDA laga dhigayo kan ugu horreeya, si loo dhiso isbahaysi ballaaran oo heer qaran ah. Dr Oburu Odinga ayaa loo xilsaaray hoggaaminta wadahadallada, kuwaas oo la socon doona kulammo wadatashi oo dalka oo dhan ah si aragtida xubnaha ODM loo ururiyo. Haddii heshiis hordhac ah la gaaro, xisbiga ayaa qaban doona Shirweynaha Ergada Qaranka (NDC) si loo ansixiyo.
Ka dib kulankii Kilifi, xildhibaannada ODM ayaa kulan kale ku yeeshay Nairobi, halkaas oo ay si buuxda u taageereen go’aannadii CMC. Waxaa ay ku boorriyeen hoggaanka xisbiga inuu dedejiyo wadahadallada isla markaana uu la macaamilo xisbiyada kale si is afgarad ku saleysan tanaasul, si loo helo waddo cad oo xukuumad lagu gaari karo 2027-ka.
Si kastaba ha ahaatee, kulankii Kilifi ayaa waxaa ka maqnaa xoghayaha guud ee xisbiga Edwin Sifuna, arrin dhalisay dhaliilo gudaha ah. Qaar ka mid ah hoggaamiyeyaasha ayaa ka digay in khilaaf noocaas ah uu wiiqi karo midnimada xisbiga, iyagoo carrabka ku adkeeyay in wadaxaajoodyo kasta oo isbahaysi ah ay tahay inay ka tarjumaan rabitaanka iyo danaha taageerayaasha ODM guud ahaan dalka.
